ای نازلی نگاریم سنه خاطر

قلبیم داریخار آشقام اولاندا

حسرتلی باخار یولّارا عاشق

گوز یاشی آخار آشقام اولاندا

سنسیز اورگیم سینه ده قاندو

باخ عاشیقیین حالی یاماندو

پیکرده فقط بیر قورو جاندو

هجراندا چیخار آشقام اولاندا

گون باتدی گَنَه گلمدی یاریم

یاردان نه دییم دار و نداریم

اَلدن آپاروب صبر و قراریم

داق اولسا ییخار آشقام اولاندا

رحم اِیلَه گینن عاشق زاره

باخ بو سارالان سولموش عُذاره

بو عشقی آپارسامدا مزاره

سندن داریخار آشقام اولاندا